ملحوظة على الهامش...

طب حاجة على الهامش، بس مهمّة يعني...

هو ليه لمّا آجي أتكلّم على حاجة لها علاقة بالزواج أو موقف استوقفني له علاقة بالعلاقة ما بين الأولاد والبنات، ألقى رد فعل من اثنين:

1) إزّاي ميّ الدرديري تتكلّم في حاجة Minor و "بناتي" كده؟! ده مش أنتِ خالص ولا أنتِ بتتكلّمي في هذة المواضيع! (مع نظرة تفاهة باختلاف درجاتها)

2) إزّاي تفكّري وتتكلّمي في كده؟! بصّي، فكك! ومتخلّيش الحاجة دي أو أي حد يشغل دماغك!

ولمّا متكلّمش، يا بنتي عيشي حياتك وخلّيكِ طبيعية مش كل كلامك مجعلص كده وكلّه قراءة وكتب وأمة وبتاع!

يا جدعان، هو مش أنا بني آدم عادي طبيعي زي أي حد فيكم؟! ليّ أفكاري ومشاعري وأحلام وطموحات؟! D: زي أي حد بينجح ساعات ويقع ساعات ويزعل ساعات ويتوجع ساعات ويفرح ساعات (ممكن على حاجة أنتَ تبقى شايفها تافهة بس بالنسبة لي لأ :) )؟! :) 

لا أنا سوبر هيرو ولا أنا شخصية تافهة.... أنا بأحاول أبقى مُسلمة صح في كل جوانب الحياة :) ومن أحد الجوانب، إنّي هأتجوِّز وأكوِّن عائلة في يوم من الأيام إذا ربنا أراد يعني D:

إسلامنا لا يُحرّم الطبيعة البشرية والغرائز الموجودة في كل واحد فينا ولكن يضعها وينظّمها في الإطار اللي يخلّيها على الوجه اللي يُرضي الله عزّ وجل وتبقى عبادة وتأخذ عليها ثواب أيضاً :))

بلاش تأليه حد وبلاش تستصغر كلام حد وثق فيك إنّه يتكلّم معاك في حاجة أنتَ عارف إنّها بالنسبة له خاصة وتحسسه بإنّه تافه :)) 

انتهى.. 

ارجعوا للسياسة بقى اللي واكلة الدماغ D: