A Thought in A Photo (27): و ما أُتيتم من العلم إلا قليلا

سمعت مقولة قبل كده تقول: "العلم ثلاثة أشبارمن دخل في الشبر الأول تكبر، ومن دخل في الشبر الثانى تواضع، ومن دخل في الشبر الثالث علم أنه ما يعلم".

من أول ما سمعتها و هي جذبت انتباهي... كنت عارفة كويس أوي هي بتتكلّم عن إيه لإنها أصلا ذُكِرت في القرآن في آيتين و أكثر...

الأولى: "وَمَا أُوتِيتُمْ مِنْ الْعِلْمِ إِلاَّ قَلِيلاً" و الثانية: "قُلْ لَوْ كَانَ الْبَحْرُ مِدَادًا لِكَلِمَاتِ رَبِّي لَنَفِدَ الْبَحْرُ قَبْلَ أَنْ تَنْفَدَ كَلِمَاتُ رَبِّي وَلَوْ جِئْنَا بِمِثْلِهِ مَدَدًا" 

بس عمري ما حسيت بالمعنى العميق للآيات ديه و لا المقولة دي غير دلوقتِ!!

سبحان الله!!! كل ما الواحد يقرأ حبّة زيادة و يعرف و يتعلّم حبتين زيادة، يحس إنه "حبة رمل" في بحر!!! تحس إنك ما تعرفش أي حاجة في أي حاجة!!! و إن لسة قدامك كتيييييييييييير أوي تتعلّمه!!! و العلم عمره ما بيخلص!! و تلاقي سبحان الله، سبحان الله، تتجلّى عظمة الخالق أمام عينيك و أد إيه أنت حاجة لا تُذكر أصلا و إن مفيش أي حاجة بـ "شطارتك و فلاحتك"، كلّه فضل من ربنا و بس!!

بابا كان كتير يقول لي "أنا نفسي أتعلّم و أبقى شاطر"... كان رد فعلي الوحيد ساعتها إنّي أبصّله و أتنح و أقول له "ماشي يا بابا =/" -مع العلم أن بابا من أشطر الناس اللي شفتها في حياتي و إنّه من مُثُلي العليا-

دلوقتِ بقى كل ما يقول لي كده، أرد عليه "و أنا كمان"... يبصّلي و يضحك و يقول لي "عرفتي بقى أنا كان قصدي إيه"؟... أرد بابتسامة صامتة و يرد كل كياني "أيوة عرفت و يلّا بينا نتعلّم بقى"...

هنفضل نتعلّم لغاية ما نموت... عمر ما الواحد يقدر يقول إنه خلاص كده اتعلّم و كفاية! أبدا!!!! 

دلوقتِ بأقول بكل كياني "أنا نفسي أبقى شاطرة"!! =)

اسأل الله أن يكتب لنا الدخول في الشبر الثالث من العلم...

 فاللهم علّمنا ما ينفعنا و انفعنا بما علّمتنا... 

اللهم زدنا علما... لا لنمارى به السفهاء ولا لنكاثر به العلماء ولا لنرائى به الناس ولكن ابتغاءً وجهك الكريم و إحياءً و عزةً للإسلام :)