خاطرة وكلمتين..

عندي خاطرة وكلمتين خصوصاً للناس المُحبَطة وشايفة الدنيا سودة وإن "مفيش فايدة" و"إن البلد دي عمرها ما هتتعدل" :)

1) كلمة هنقلها عن الدكتور راغب السرجاني من مُحاضرة كيف تُصبح عالماً..

كلمة "مفيش فايدة" مينفعش أصلاً تبقى موجودة في قاموس المُسلم.. لأن سعادتك لو مش مؤمن مليون في المية إن نصر المسلمين جيّ لا محالة، يبقى حضرتك تروح تراجع عقيدتك... أيوة! العقيدة ذات نفسها :)

لأن ربنا سبحانه وتعالى وعدنا بالنصر... امتى؟ منعرفش! علشان كده لازم نسعى... مقتنعة جداً إن ساعة ما النصر هيجي، هيبقى في نوعين من الناس... النوع الأول، نوع بيتفرّج على موكب النصر ويستمتع بالنصر ومزاياه والمترتبات عليه... بس في الآخر هو فقط "مُتفرّج"!

النوع الثاني، نوع شارك في صناعة النصر! -وعلى فكرة المشاركة، مش لازم الحاجة الفوووووو يعني! بس كان لازم ولابد من وجودها علشان يكتمل النصر- ...

فسعادتك بقى، عايز تبقى من أنهي نوع؟! :)

الإجابة ترجع لحضرتك، بس تنويه بسيط... اوعى تفتكر إن النوع التاني سهل! أبداً... هيبقى أكثر واحد بيتعب (سواء تعب جسدي أو تعب نفسي)، بس أحب أفكّره بالآية دي "أَمْ حَسِبْتُمْ أَن تَدْخُلُواْ الْجَنَّةَ وَلَمَّا يَأْتِكُم مَّثَلُ الَّذِينَ خَلَوْا مِن قَبْلِكُم مَّسَّتْهُمُ الْبَأْسَاء وَالضَّرَّاء وَزُلْزِلُواْ حَتَّى يَقُولَ الرَّسُولُ وَالَّذِينَ آمَنُواْ مَعَهُ مَتَى نَصْرُ اللَّهِ أَلا إِنَّ نَصْرَ اللَّهِ قَرِيبٌ"
الرسول ذات نفسه والصحابة وصلوا لمرحلة إنّهم يقولوا متى نصرُ الله! تخيّل حالهم كان عامل إزّاي بس شوف حصل إيه بعد كده علشان صبروا للآخر وكان عندهم يقين!

2) حين تكتمل أسباب الخلق، يأتي مدد الخالق" - الشيخ محمد متولي الشعراوي، رحمه الله 
أي إنجاز في حياة الواحد بيجي "فضلٌ من الله عز وجل"، مش "بشطارته ولا فلاحته" ولكن بصفاء نيته وبآخذه بالأسباب :)

فاكتمال أسباب الخلق بالنية الخالصة لله والآخذ بالأسباب...

اخلِص النيّة واشتغل :) لأن أولاً "إنّما الأعمال بالنيات"، ثانياً "إن الله سبحانه وتعالى يقبل أنصاف أعمال ولكن لا يقبل أنصاف نوايا"... احنا علينا الـProcess، الـResults دي مش بتاعتنا...

فسعادتك، لمّا يبقى عندك حاجة ممكن تنفع بها البلد والأمة عامةً، مينفعش "تهرب" وتسيبها وتِخلع!

لو احنا سبناها، مين هيصلّحها؟!!

الله المُستعان...