قالوا عليكِ مفكيش أمل
قالوا على الثورة فوضى و خبل
قالوا على الثورة فوضى و خبل
قالوا كنّا كويسين
كنّا مستريحين
كنّا عايشين
أما دلوقتي
الخوف و القلق على قلوبنا مسيطرين
لا عارفين نرتاح
و لا بالليل ننام مطّمنين
اعذريهم يا بلد
أصلهم مش عارفين
أن ثمن الحرية غالي مش رخيص
أن عشان نعيش صح
لازم نبذل الغالي و النفيس
ناسيين الذل اللي كنّا فيه عايشين
و ملكوت اللاواعي اللي كنّا فيه مغيّبين
بنتنهب و احنا مش حاسّين
نتفرج على الكورة و الأفلام
و الهلس... ده اللي كنّا فيه فالحين
اعذريهم يا بلد
أصلهم مش عارفين
طاقة شبابك... كنوزك المدفونين
مصدقوش غير لمّا شافوا قدامهم
في التحرير ملايين
بينادوا حرية و كرامة
و من هنا مش ماشيين
مصدقوش غير لمّا شافوا
قوة الظلم بتنهار
و اللعب القذر اللي كان ورا الستار
و بعلو الصوت ولادك بيقولوا
الله أكبر... الله أكبر
سبحان المعز المذل
سبحان الرحيم الجبار
عهد عليّا يا بلد
لأفضل أحارب و أصلّح فيكِ
لأفضل أعمّر و أخضّر أراضيكِ
عهد عليّا يا بلد
لأفضل أحاول لآخر رمق
و نبقى الجيل اللي ف تاريخك فرق
و يرجّع خيرك و حقك اللي اتسرق
و سد الظلم و الجهل لازم ينهد
لأجل شعاع النور يطلع يشقشق
و العصفور في سماء حريتك يزقزق
و آذان الفجر يدوي
يعلن بداية عصر جديد
عصر ناس، تبني و تعمّر بعزم شديد
عصر ناس، الحلم و النصر شايفاهم أكيد
عصر ناس، على الظلم تضرب يإيد من حديد
و ترجّعك يا مصر على راس الدنيا
بإذن الواحد الأحد
بإذن المنان الرحيم
No comments:
Post a Comment