Random Thought (30): ذكاء وحرص واجتهاد

لو أنتَ مش عايز تتعب علشان تتعلّم، يبقى مش هتتعلّم... 

ومُعلّمك وظيفته يوجّهك مش يعمل لك شغلك..! 

Random Thought (29): عوائق..

شوية نقاط لازم نأخد بالنا منها واحنا بنتعلّم على الماشي كده 

في كام عائق لطلب العلم مُهم نعرفهم:

1) العبث المحض: وهو تعلّم العلم من غير ما تعرف فوائده وثماره (هتستفيد منّه بإيه وهتستخدمه في إيه)

2) العبث العرفي: وهو تعلّم المطوّلات قبل ما يُناسِب المُبتدئين (يعني تذاكر من الـReference وأنتَ مش فاهم هو بيتكلّم في إيه أساساً)

3) الجهل العرفي: أنتَ تبقى جاهل بمسائل العلم (يعني مش عارف الـTopics والعناوين اللي بيتكلّم فيها العلم)

قبل ما تبدأ تذاكر ولا تتعلّم، اعمل خريطة العلم دي علشان تبقى فاهم راسك من رجليك وأنتَ بتعمل إيه فين ليه وإزّاي... 

من غيرها هتحس بغباء ملوش حل وإن الدنيا سودة D: ولا هتعرف تنجز علشان مفيش خطوط عريضة واصحة! (واسأل مجرّب D:) 

الله المُستعان

Random Thought (28): Let them take care of you, but...

اسمح للناس اللي حواليك يهتمّوا بك.. الواحد ساعات بيوصل لمرحلة من التعب والإرهاق، بيبقى مش قادر يشيل نفسه.. 

خلّيهم يقفوا جنبك يؤازروك ويساعدوك.. حب الناس ده نعمة كبيرة.. :) 

وفي نفس الوقت، متبقاش أناني.. وكل تفكيرك فين حقوقي؟! همَّ المفروض يعملوا لي إيه ومبيعملهوش؟!... ركِّز وهتلاقي للأسف التفكير ده في كل علاقتنا تقريباً! أصدقاء، أخوات، زوج وزوجة، شغل، سياسة... أيً كان.. كُلّنا طمّاعين وبنفكّر في نفسنا وبس! 

عمرك وقفت وفكّرت للحظة إيه واجباتي بقى؟! شيفت البارادايم، من فضلك :) 

جرّب لمدّة أسبوع واحد تنسى حقوقك وركِّز على واجباتك واعملها من غير ما تتوقّع حقوقك.. وشوف الفرق..

ربنا يجعلنا له كما يحب ويرضى..